周三凌晨英超兩強喺歐聯背城借一分途出擊，其中C組「紅軍」利物浦將會主場硬撼拿玻里。利物浦要爭取出線嘅條件其實好簡單，一係乾脆利落以1比0擊敗對手，一係就要以2球或以上優勢取勝，只要達成上述其中1項戰果，紅軍就可以唔使睇另一場戰果，直接順利晉級淘汰賽。
當然講就容易，要令拿玻里一球都唔入，仲要前場進攻有貨交，絕對唔簡單，「紅軍」想成功突圍，就要交出強者生存應有嘅，好似外國人講開嘅英文金句："When the going gets tough, the tough gets going"意思即係強者能喺險境生存、遇強愈強也！相反同組另一場比賽，巴黎聖日耳門（PSG）作客對住小組包尾貝爾格萊德紅星，可以話係勝券在握。PSG上屆歐聯貴為大熱球隊，卻早早喺16強就遭淘汰出局，今季球隊實力更勝以往，對住弱旅冇理由唔贏波。
B組出線形勢微妙
至於B組有熱刺作客巴塞隆拿，巴塞賽前已經鎖定首名位置，所以呢場無論結果如何，對巴塞嘅小組形勢係一啲影響都冇，變相成為對熱刺嘅有利之處，而同熱刺同分嘅國際米蘭，面對肯搏盡嘅燕豪芬，想贏波其實都絕對唔容易，所以筆者認為B組嘅形勢其實相當微妙。