今晚歐聯分組賽煞科日頭場之一，G組「1哥」皇家馬德里主場迎戰莫斯科中央陸軍，筆者亦有份評述呢場波。雖然衞冕嘅「銀河艦隊」已鎖定首名出線，但出新仔反而仲搏命，就算讓球盤要讓兩球，照捧皇馬上盤。（香港開電視77台、有線662及602台周四凌晨1時55分直播）
皇馬喺上輪歐聯輕取羅馬兩粒後，提早獲得小組首名出線。呢支連續3屆歐聯封王嘅勁旅，自從少帥蘇拿利中途接手後，9次領軍贏咗8場，連場報捷令眾將信心返晒嚟。既然係咁，今仗好大機會收起主力，但唔代表用新仔一定唔掂，其中馬高斯洛蘭迪近期趁住卡斯米路受傷，乘機上位，中場丹尼施巴路斯近期都好Sharp醒，而巴西前鋒雲尼斯奧斯祖利亞極具潛質，係時候要爭取表現，務求喺蘇帥心目中留下好印象，連同馬高阿辛斯奧及盧卡斯華斯基斯每逢出場都有貨交，呢班「生牯仔」上陣隨時更搏命。
中央陸軍踢歐聯未夠班
作客嘅中央陸軍依家排包尾，近3場歐聯輸晒擺明唔夠砌，由於對賽較差，佢哋除要盡力爭勝搶分，亦寄望柏辛域陀尼亞今輪失分，先可爬上第3取得歐霸資格，但作客要喺皇馬身上搶分難度太高，捧番上盤好過。
鬼Sir識玩
張志德
本港至型足球明星，519入波功臣，人稱鬼Sir，現為有線電視台柱級資深講波佬。