周四早上南美球會盃決賽次回合生死鬥，帕拉尼恩斯返回主場同哥倫比亞球隊青年體育會再決高下。首回合同對手打成1比1嘅巴甲隊伍帕拉尼恩斯，今屆南球盃主場出擊表現有保證，今場有力乘主場優勢擊敗對手捧盃，1.57倍主勝冇走雞。
（有線602及662台周四早上7時45分直播）
帕軍主場特別醒神
睇完南美自由盃決賽，輪到次一級嘅南球盃決賽激戰，近年巴甲代表喺南球盃表現突出，今屆又有代表脫穎而出，講緊就係帕拉尼恩斯。佢哋首回合作客面對哥倫比亞球隊青年體育會表現頑強，最終以1比1摸和對手，其中攻擊好手歷卡奧今屆演出令人眼前一亮，繼4強搶得入波之後，決賽首回合又交出關鍵助攻，今場有佢喺前鋒線衝鋒陷陣，要入波冇難度。況且帕拉尼恩斯主場特醒，球隊今屆南球盃5仗主場獲得4勝，今仗絕對有力贏波坐上冠軍寶座。
況且實力麻麻嘅青年體育會，出戰南美盃賽明顯主強客弱，計埋南球盃同自由盃在內，近5場客戰只得1勝1和3負，作客成績毫無說服力，今場遠赴巴西形勢更不樂觀，捧主勝可謂屬明智之選。