今晚歐聯分組賽F組生死戰，「3哥」薩克達主場火併次席里昂。由於曼城已穩得呢組一個出線席位，因此餘下一個出線名額，由今場兩隊所爭，絕對係「兩個只能活一個」格局，兩軍定必鬥攻搶Ｗ，里昂今屆分組賽5戰全開3球或以上，中位數2.5入球大盤乃不二之選。（Now 645、有線661及601台周四凌晨4時直播）
依家里昂領先薩克達2分，今場只要和波足夠守住次名出線，換句話講薩克達必需贏波，先可反壓對手晉級，既然冇晒退路，主隊趁地利惟有喪攻爭勝。另一邊廂里昂不嬲攻強守弱，雖然王牌費基亞近況麻麻，好彩佢好拍檔迪比弗到震，呢位荷蘭國腳同另一位中場艾奧亞，各自交出3個助攻下，協助里昂今屆歐聯合轟11球，面對英超班霸曼城亦取得1勝1和，戰鬥力不容小覷。
防線鬆散里昂以攻代守
但針無兩頭利，里昂過於着重進攻，搞到防線不穩，於上述5場共失10球，總入球全開3球或以上，包括主場對住實力較弱嘅賀芬咸，領先2粒都畀人追番2比2，條防線真係一篤即散，今仗隨時以攻代守，2.5球嘅大盤極抵玩。