今晚歐聯H組煞科戰，華倫西亞主場迎戰曼聯。「紅魔」爭首名仲未絕望，但佢哋今屆歐聯踢法保守，尤其前場進攻常遇阻滯，作客對住擅守嘅華倫，半場睇怕膠着居多，捧半場和最穩陣。（Now 643周四凌晨4時直播）
聯賽狀態飄忽嘅曼聯，踢歐聯反而更對辦，上輪擊敗年青人後已提早搶到16強席位，曼聯現時落後榜首祖雲達斯2分，仲有機會後來居上，可惜一班前鋒喺莫連奴麾下全面啞火，盧卡古今屆歐聯仲未開齋，令人失望，搞到「紅魔」近4仗歐聯有3次開出半和，包括首循環主場都只係同華倫悶和0比0。主場出擊嘅華倫今季靠防守搵食，篤定獲小組第3轉戰歐霸嘅佢哋，今晚但求唔失威，半和值博。
祖記保首位勢嗒魚腩
同時間同組另一場年青人主場對祖雲達斯。瑞士代表年青人明顯未夠班，小組5戰後只得1分墊底篤定出局，相反擁有C朗、保羅戴巴拿同文迪蘇傑等進攻好手嘅祖記，為守住小組首名遇「魚腩」唔會手軟，讓球客勝捧得過。