歐聯分組賽E組最後一輪，阿積士主場同拜仁慕尼黑爭小組首名。雙方賽前已篤定打入16強淘汰賽，拜仁今仗和波都夠首名出線，但歷來作客阿積士往績輸蝕，今場讓唔起全面升呢嘅主隊，阿積士今屆分組賽主場兩戰全勝，受讓平半黑柴力撐下盤！（有線662及602台周四凌晨4時直播）
歐洲「少林寺」再爆新星
阿積士以往一向係球壇青訓翹楚，堪稱歐洲「少林寺」，球隊經歷過一段漫長嘅艱難時期後，終於捱到中興迹象，前季以極年輕班底攞到歐霸盃亞軍，今屆更係近13年來首次殺入歐聯淘汰賽。陣中除超新星法蘭基迪莊同馬菲斯迪歷特成為全歐洲豪門挖角焦點外，啱啱傷愈嘅摩洛哥進攻中場薛耶治同巴西年輕前鋒大衞拿尼斯都係轉會市場搶手貨，現時陣中人腳實力遠比兩年前歐霸亞軍隊成熟，前線又有德甲熟人亨特拉爾領軍，年屆35嘅佢仲係球隊首席射手，今晚對住昔日史浩克04隊友紐亞，會特別肉緊爭入波。
拜仁滑落冇乜優勢
阿積士今晚仲有一項優勢，就係佢哋打德甲兵特別有心得，過去主場16次對德甲兵贏咗14場，歷來4次主場對拜仁亦獲3勝1和，阿積士分組賽首循環作客安聯球場，補時階段舒奧尼幾乎絕殺拜仁，可惜射門畀紐亞救到再中楣彈出，最終和波，足見佢哋有抗衡拜仁嘅實力。何況主帥坦哈格喺2013至15年曾執教拜仁二隊，對呢支德國班霸知根知底。
拜仁今季戰鬥力明顯係近年最弱，目前喺德甲已落後多蒙特9分，新帥尼高高華仲未能夠喺更衣室樹立權威，現時人腳相比起阿積士亦冇明顯優勢。拜仁今仗只要和波就可首名出線，冇必勝欲望，作客讓波捧對家。