當弗射手單挑入球王
周五澳職獨腳戲，布里斯班獅吼將會主場硬撼墨爾本勝利。獅吼今季開咧戰績雖然麻麻，可幸射手阿當泰加特腳風夠順，呢場對住有星級鋒線壓陣嘅勝利，有力同對手演對攻戰，中位數2.5球入球大唔好錯過。（Now 639、有線615及655台周五下午4時50分直播）
獅吼上季27場常規賽只係入到33球，攻力排聯賽尾3，今季由珀斯光輝簽入射手阿當泰加特，就係為咗加強前場把握力，呢位13/14賽季澳職金靴獎得主加盟後都好爭氣，開咧7戰已經有5球進帳，腳風大順，嚟緊佢將會第100次喺澳職上陣，咁值得紀念嘅日子，肯定會全力爭取入波好好慶祝。不過，獅吼後防表現認真靠唔住，近5仗聯賽有4場都失2球，呢場隨時又失幾粒。
勝利鐵三角火力猛
勝利聯賽5連勝狀態托弗，開咧入16球鋒力冠絕澳職，其中前瑞典國腳托禾倫近3仗上陣入2球，正迅速融入球隊戰術打法，搭住今季夾埋已經貢獻9球嘅本田圭佑、巴巴路西斯同安東尼斯攻擊鐵三角，勝利前場火力絕對有番咁上下。兩隊近4次交手合共炮製14球，其中3場開3球或以上，中位數2.5球入球大好路。