德甲壓軸戲，榜首多蒙特主場迎戰雲達不來梅，多蒙特主場固然火力十足，近期更行運行到落腳趾尾，全隊士氣好到加零一，今晚勢同作客唔識守嘅不來梅大駁火，大家等睇入球騷，黑柴推介中位數3.5球大盤。
（on.cc東網周日凌晨1時30分直播）
多蒙特近期旺到冇朋友，上輪聯賽喺佢哋最重視嘅魯爾區打吡作客擊敗死敵史浩克04，原本已經開心到癲，而佢哋嘅爭標勁敵近幾輪又排住隊失分，令佢哋榜首優勢增至7分，跟住歐聯又因為勁敵馬德里體育會喺最後一輪分組賽無端端失分，佢哋半力搞掂摩納哥搶埋小組首名，簡直係意外驚喜。嗰場波多蒙特仲刻意收起馬高列奧斯、查頓辛祖、韋素同湯馬士迪蘭尼等主力，留番今晚夫添出擊，佢哋今季主場聯賽7戰6勝1和未輸過，每仗最少都入兩粒，今晚上足彈藥對不來梅唔憂冇波入。
不來梅近況唔算出色，但佢哋今季作客場場都有波入，近9次對多蒙特每場都有入又有失，今晚少帥高菲特愛徒拉斯卡傷愈復出，勢同多蒙特鬥入波。