頭場東網都有直播，史特加主場對哈化柏林，史特加上輪慘吞慕遜加柏3蛋令佢哋留喺降級區，不過咁都未夠傷，最慘係陣中最有卡士嘅防線支柱班捷文柏華特受重創，今年之內都難復出，加上中場艾歷湯美停賽，陣容嚴重不整，明醒近況全面回勇嘅客軍，今場平手盤撐硬哈化柏林。
（on.cc東網周六晚10時30分直播）
現年22歲嘅法國世界盃冠軍功臣班捷文柏華特，一直係史特加陣中嘅最大牌球星，佢喺近3個球季，已經連續為史特加喺聯賽上陣咗60場，仲一早畀班霸拜仁預訂咗，喺明年夏天正式收購，雖然拜仁提出喺下月轉會窗重開時提早收購，但史特加立即拒絕，堅係冇咗佢唔得，今晚因傷缺陣對防線打擊極大。史特加喺新帥韋恩薛亞上任後7場聯賽輸咗5場，似乎未有辦法令呢支老牌球隊走出低谷。
首都球會哈化柏林之前表現曾經見反覆，不過近期回復穩定兼回勇，連贏兩仗兼冇失波，上輪仲爆冷力挫今季神奇球隊法蘭克福，士氣正盛，今晚夠料趁史特加陣容不整力爭3連勝。