今晚11點開波英超賽事，焦點落喺「3哥」熱刺主場鬥般尼。熱刺今季16場聯賽贏12場，4場輸波有3場對手係Big6球隊，對住中下游隊伍極有把握，加上般尼今季神奇不再，聯賽4次對Big6球隊全部都輸2球或以上，熱刺讓兩球照捧上盤。
（Now 621周六晚11時直播）
般尼鬥Big6輸得甘
今季熱刺開季表現雖然唔及曼城、利物浦同車路士咁標青，早於第4輪已被屈福特打破聯賽不敗身，不過佢哋之後12輪聯賽攞到9勝3負，3場輸波對手分別係利物浦、曼城及阿仙奴，可謂雖敗不辱，而且從另一角度睇，熱刺對住非Big6球隊甚少甩拖，好似近2場聯賽都以2球差距擊敗修咸頓及李斯特城，贏得十分輕鬆。
般尼上季聯賽以冷門姿態攞到第7名，成績僅次於Big6，其中上季首循環就曾經作客逼和熱刺1比1，不過嚟到今季，佢哋嘅穩守突擊戰術好似唔多掂，踢咗16場聯賽已失32球，唔單只係英超失波第2多球隊，僅次榜尾富咸，而且般尼今季4次鬥Big6球隊全敗，全部輸2球或以上，4場加埋失14球，對住近況大勇嘅熱刺睇怕凶多吉少，熱刺讓兩球唔嫌多。