周日凌晨意甲大戰，拖連奴主場同祖雲達斯上演「都靈打吡」。意甲班霸祖記今季聯賽開咧到依家一路帶出，走勢強勁，其中C朗嘅加盟明顯令球隊戰意更加旺盛，鋒線表現飄忽嘅拖連奴根本唔係「老婦人」對手，祖雲達斯讓半一上盤冇走雞。
（Now 638、有線614及654台周日凌晨3時30分直播）
稱霸意甲球壇多年嘅祖雲達斯，今季繼續交出統治級表現，上仗聯賽靠前鋒文迪蘇傑嘅致勝球，以1比0擊敗聯賽主要競爭對手國際米蘭之後，「老婦人」今季聯賽已經豪取14勝1和嘅佳績，仲以8分優勢拋離追兵拿玻里，聯賽積分榜高踞榜首，其中球隊近6仗聯賽大獲全勝，勢不可擋，隨住已經斬獲10個聯賽入波嘅頭號射手C朗，同球隊磨合日漸成熟，嚟緊祖記戰力只會有增無減。
拖連奴火力弱難發圍
「狂牛」拖連奴表現飄忽，尤其前場攻力麻麻，係意甲前6分子中入球數最少嘅球隊，其中頭號射手比洛迪聯賽至今只貢獻5球，新加盟嘅施蒙尼沙薩仲只係得1球進帳，入球能力可見一斑，今仗面對全意甲防守成績最佳嘅祖記，拖連奴根本難有本錢發圍，更難招架對手的犀利進攻，捧上盤係最佳選擇。