今晚英超重頭戲梗係壓軸尾場嘅「雙紅會」。以往呢類死敵對碰必定打甩髀，所有數據都可以掟埋一邊唔使理，不過今時今日兩隊明顯有高低，唔可以再用上述思維去睇呢場大戰。
先講利物浦，唔單止有地利，啱啱周中歐聯淘汰拿玻里晉級16強，士氣大振，其中貴價門神艾利臣比加屢救險球，尤其臨完場前嗰球非常關鍵，再次證明一位超級門神，可協助球隊由輸變和、由和變贏，甚至由出局變出線。連同荷蘭中堅華基爾雲迪克喺後防一柱擎天，可見主帥高普獨具慧眼。佢亦令後備球員有隨時候命嘅飢渴感，好似梳頓沙基利、史杜列治及奧歷治等副選，每逢落場都交到貨，可見高普深得麾下愛戴及信任。
相反「寸王」莫連奴近年執教皇馬、車仔以至依家嘅曼聯，經常搞到「家嘈屋閉」，不斷批評麾下球員，內部士氣低落，眾將唔落力成績點會好呢？失去對更衣室嘅控制力，此乃領隊兵家大忌。「寸王」入主紅魔後，單係睇佢高價簽入嘅保羅普巴、盧卡古及阿歷斯山齊士，明顯眼光獨「倒」，論名氣人腳屬Big 4，但個個冇料到，難怪聯賽被踢出前5。加上「寸王」過於保守嘅戰術，有抑壓球員發揮之嫌，絕對責無旁貸。今晚主隊明顯秤先啲，曼聯想搶分機會只得兩個──渺茫同冇機會！