萬眾期待嘅英超「雙紅會」今晚上演，利物浦坐鎮晏菲路主場鬥死敵曼聯。「紅軍」今季勇不可當，未計尋晚賽果力壓曼城暫列榜首，亦係目前英超唯一不敗球隊，不過莫連奴嘅「大巴」戰術對親利物浦都收效，曼聯受讓一球高水1.97倍夠晒吸引，信多次「莫一招」撐下盤！（Now 621周一凌晨零時直播）
今時今日如果話利物浦高曼聯半班波，無論你係利迷定曼迷相信都會同意。事實上數據證明一切，利物浦除咗喺積分榜領先曼聯多達16分，今場主Ｗ熱到得1.44倍，係英超歷來「雙紅會」最熱一次，就算睇番場內表現，近幾次對賽無論控球率，射門次數都遠遠喺曼聯之上。不過值得留意嘅係，曼聯自莫連奴上任以來，聯賽4次對利物浦保持1勝3和不敗，即使畀你攻到慌，其中3場控球率得番3成幾都好，到最後佢架「大巴」都係頂得住。
當然，樂比絕對認同久守必失呢個道理，尤其曼聯防守根本談唔上穩健，今季已失咗26球，係「紅軍」4倍有多，況且「紅魔」防線上傷兵眾多，好似馬高斯盧祖、勞基梳爾、達洛治、達美安及域陀連迪路夫等人都有傷，不過佢哋放棄控球權之餘，唔係完全冇還擊之力，今季喺車路士、阿仙奴及曼城等強隊身上都取得入球，絕對唔係偶然，利物浦今場要贏兩粒先贏盤並唔吸引，如果真係對「紅軍」有信心嘅話，倒不如買大盤更實際，皆因曼聯今季所有賽事11場作客，僅得1場開唔到大。
紅軍歐聯搏盡體力較輸蝕
「紅軍」今季Big 6交手成績唔算突出，對曼城、阿仙奴同車路士都係打和，而曼聯比利物浦其中一個優勢係上周中歐聯收起咗迪基亞同尼曼查馬迪兩名主力，利物浦則喺生死戰搏盡險勝拿玻里1比0，消耗唔少體力。曼聯今場心態明顯係守和1分都收貨，以莫連奴嘅往績唔難做到。