河床連征歐亞兵疲備戰差
周三凌晨世冠盃準決賽，東道主艾阿恩將會迎戰河床。河床雖然啱啱拎完南美自由盃威到盡，不過過程崎嶇，肯定消耗唔少體力，加上南美球隊近年出戰世冠盃表現麻麻，今場作客中東有暗湧，河床讓波之下，捧艾阿恩讓球主勝好過。
（周三凌晨零時30分開賽）
阿根廷球隊河床貴為自由盃新王，可以代表南美出戰今屆世冠盃，過程可以話一啲都唔容易，皆因早前嘅自由盃決賽次回合，因為球迷騷亂拖延多時，搞到滿城風雨，最終要轉場去到西班牙先有得同死敵小保加決一勝負，比賽仲要激戰到加時，河床先以3比1成功反勝，兩回合計贏5比3捧盃。呢次匆忙再趕嚟亞洲踢世冠盃，舟車勞頓肯定影響球員備戰。況且近5屆南美代表喺世冠盃準決賽法定時間內，只係取得1勝2和2負，優勢實在無幾，今次仲要讓波實在捧唔落手。
東道主過兩關士氣好
相反，憑東道主身份獲參賽資格嘅阿聯酋球隊艾阿恩，先喺資格賽落後3球劣勢下連追3球，最終以互射12碼淘汰FC威靈頓，之後再喺半準決賽以3比0輕取非洲代表艾斯柏蘭斯，主場出擊可謂愈戰愈勇，而且球隊有前日本國腳鹽谷司，以及瑞典國腳馬古斯貝治壓陣，實力不容忽視，有力乘主場優勢再創佳績，讓球主勝咪錯過。