今晚英格蘭聯賽盃8強爆發北倫敦打吡，阿仙奴喺主場火併死對頭熱刺。雙方今個月先喺聯賽碰過頭，阿仙奴同樣喺酋長球場以4比2反勝熱刺，何況佢哋近年喺自己地頭專恰死敵，今仗仲唔使讓波，平手盤必捧阿仙奴。
（周四凌晨3時45分開賽、馬會網上文字直播）
今次係阿仙奴、熱刺兩支北倫敦死敵本月內第2次交鋒，上次聯賽碰頭，阿仙奴喺半場落後1比2劣勢下，換邊後連轟3球反勝4比2，贏得極具說服力，成功掃走季初接連不敵曼城、車路士嘅陰霾。雖然阿仙奴日前聯賽作客以2比3不敵修咸頓，近22場不敗亦告斷纜，不過嗰場有梅斯達菲等中堅停賽，防線天殘地缺，輸波亦無話可說。
近9次主場踢打吡戰未輸過
阿仙奴自聯賽揭幕戰於地頭輸畀曼城後，已經連續13戰主場不敗，加上近9次主場出戰北倫敦打吡，取得6勝3和，今次續於酋長球場呢個福地迎敵，信心爆棚。
熱刺喺聯賽排名高過阿仙奴，但佢哋今季盃賽成績麻麻，其中英聯盃第3圈僅憑互射12碼淘汰屈福特，6場歐聯分組賽亦只有1場保持清白之身，最終能夠出線16強，某程度上多得國際米蘭自毀長城打和燕豪芬；阿仙奴對上2圈英聯盃先後淘汰英冠嘅賓福特及英甲嘅黑池，所受考驗不大，不過佢哋喺今屆歐霸6戰5勝1和，當中5場冇失過波，防線演出相對比熱刺穩健，而王牌奧斯爾近期不受重用，今仗誓要踢爭氣波，難得主場出擊唔使讓波，平手盤梗係揀番「兵工廠」喇。