兩年前同皇馬都有得砌
今晚喺阿聯酋中立場舉行嘅世冠盃4強戰，上演兩年前決賽翻版戰，由衞冕冠軍皇家馬德里硬撼亞洲代表鹿島鹿角。「銀河艦隊」舟車勞頓下堅攰，鹿角上圈反勝士氣大振，眾將誓報前年一箭之仇必搏殺，讓球主客和受讓兩球咁筍，必捧鹿角讓球主勝。
（周四凌晨零時30分開賽）
連續3屆稱霸歐聯嘅皇馬，今屆力爭世冠盃3連霸，但皇馬在經歷易帥後，新帥蘇拿利只算是穩住局面，在賽程頻密下表現不太標青，而且剛從歐洲飛赴亞洲，舟車勞頓一定攰到爆。儘管防中卡斯米路已經好番復操，不過馬高阿辛斯奧去到阿聯酋完成首課操練後感到不適，今仗未必會披甲，對進攻有一定影響。
鹿角5場世冠法定時間不敗
另一邊廂，以亞冠盃盟主身份參賽的鹿角，出戰世冠盃表現硬淨，佢哋上圈對住墨超勁旅瓜達拉哈拉，喺落後1球之下，易邊後連追3粒，最終以3比2反勝晉級，繼兩年前決賽後再鬥皇馬，而交出助攻兼博得12碼、被選為該仗最佳球員嘅中場土居聖真，話兩年前對皇馬表現唔曳，但只係一時鬆懈就受到懲罰，今仗要做巨人殺手，一雪前恥。
查實鹿角喺近5場世冠盃，於法定時間取得4勝1和，包括兩年前決賽法定時間2比2賽和皇馬，戰至加時才輸2比4飲恨。今場鹿角再遇「銀河艦隊」，有條件於法定時間保住唔輸，讓球主客和仲有得受讓兩球，讓球主勝不容錯過。