往績贏晒慕遜加柏
今晚德甲上演榜首大戰，1哥多蒙特主場迎戰排第2嘅慕遜加柏；多蒙特雖然啱啱畀杜塞爾多夫打破今季聯賽不敗身，不過佢哋近年專食慕遜加柏，對上6次對賽取得全勝。慕遜加柏作客表現經常走樣，多蒙特讓一球照捧上盤。
（Now 670及Fox+周六凌晨3時30分直播）
德甲踢埋今輪比賽就進入歇冬期，依家喺榜首有6分優勢嘅多蒙特已經肯定攞到冬季冠軍，雖然佢哋周中意外輸畀杜塞爾多夫1比2，未能以不敗身完成首循環賽事，不過嗰場佢哋派咗唔少副選落場，好似馬里奧葛斯及舒姆沙都難得擔正，相信今次返主場會派強陣應戰，務求重敲勝鼓。
事實上，多蒙特上場表現唔算太差，特別係落後之下，查頓辛祖及柏高艾卡沙後備上陣搶番唔少攻勢，當中後者射入個人今季第12個聯賽入波，領先神射手榜，加上靚仔球星馬高列奧斯助陣，進攻火力肯定強盛。
慕軍作客走晒樣
慕遜加柏周中以2比0擊敗紐倫堡，將榜首差距收窄至6分，而且佢哋今季主場聯賽8戰全勝，成為德甲主場王，可惜佢哋最大問題係作客保持唔到同樣水準，今季8場作客只得2勝3和3負，對住弗賴堡、哈化柏林等中游球隊都輸波，而且慕遜加柏過去6次聯賽鬥多蒙特全部輸晒，加埋一共失咗20球，包括上季作客西法倫球場大敗1比6，今次睇怕都凶多吉少，多蒙特讓一球，上盤捧得過。