就嚟又到聖誕，英超聖誕新年快車亦正式始動，今晚先由榜首利物浦打頭陣，喺獨腳戰作客狼隊。雖然紅軍弗到漏油，但多場激戰後難免攰爆，相反狼隊今季升班後遇強愈強，5鬥Big 6球隊只係輸過1場咁大把，硬淨到暈，今仗有地利兼受讓一球，下盤值博。
（Now 621周六凌晨4時直播）
利物浦近期打咗多場硬仗，歐聯鬥到尾輪先險勝拿玻里1比0晉級，聯賽豪取6連勝，贏過愛華頓、屈福特、般尼茅夫等「豬頭骨」，而上場更以3比1勇挫死敵曼聯，紅軍全場攻門多達36次，撳住嚟砌，但都要靠後備入替嘅梳頓沙基利喺末段省兩粒，出盡九牛二虎之力先贏波，耗力不小。
利物浦傷兵多讓唔起
除咗球員未回得切氣，利物浦傷兵問題亦值得留意，除咗阿歷士張伯倫長抖，中場悍將占士米拿今仗亦上陣成疑，加上3名後衞祖爾麥迪比、祖高美斯及阿歷山大阿諾特養傷，令紅軍防線存在隱憂。
今季升班嘅狼隊，近期連勝3場企穩中上游位置。呢支老牌球隊擅打穩守突擊，而且佢哋有個特點，就係每逢遇到強隊分外Sharp醒，今季5次出戰Big 6強隊，取得1勝3和僅1負佳績，包括上次主場出擊，落後之下以2比1反勝車路士，強如曼城去到佢哋嘅「鐵竇」亦只能逼和1比1，可見其超快反擊及出色嘅死球戰術，經常令勁旅防不勝防，今場可藉地利頂住唔輸，讓球盤仲有得受讓一球，必捧下盤。