今晚英超頭7場波，只談近況不論牌面，除咗修咸頓作客哈特斯菲爾德有機會搶分外，其餘幾場主隊贏面可以話係高唱入雲，當然更值得着墨嘅，肯定係周日凌晨開波嘅卡迪夫城主場對曼聯。
卡迪夫城今次有難了，皆因佢哋要面對剛剛將前領隊「寸王」莫連奴掃出門口嘅曼聯，一班「紅魔」球員如今重見天日，肯定要以好表現擺脫頹勢，話畀外界知佢哋本來係識得贏波，只因領隊嘅打法唔啱而阻礙咗球員嘅發揮。以筆者幾廿年睇波經驗所見，有實力嘅球隊成績陷入低迷，好多情況都同教練無法控制球員有關，士氣同更衣室失控，絕對是足球場上嘅兵家大忌。
今晚曼聯改由前名宿蘇斯克查接手，眾將必定打爭氣波，「紅魔」威力隨時返晒嚟，所以我對曼聯今場作客取勝相當有信心。相反卡迪夫城認真唔好彩，如果莫連奴繼續在位，呢支威爾斯球隊都仲有搶分機會，如今時移世易，情況唔同晒，寧願睇好曼聯成功翻身踢出好成績。
今晚英超頭七主勝機高，尾場卡城對紅魔就難咯