周日凌晨世冠盃爆決賽大戰，東道主艾阿恩挑戰衞冕嘅皇家馬德里。艾阿恩今屆表現突出，問題係佢哋要連過3關先入到決賽，體能消耗極大，皇馬讓二球照捧讓球客勝。
（香港開電視77台、有線602及662台周日凌晨零時30分直播）
艾阿恩先喺資格賽淘汰大洋洲來客FC威靈頓，再贏非洲代表艾斯柏蘭斯，準決賽更勇挫南美自由盃冠軍河床，令人眼前一亮。不過要過足3關先入到決賽，一啲都唔輕鬆，上仗仲要同河床互射12碼先分到勝負，連同今場10日要踢4場波，體力無疑較輸蝕。
紀錄在前 大聖爺力爭士哥
已經連續兩屆世冠盃封王嘅皇馬，準決賽憑「大聖爺」加利夫巴里大演帽子戲法，以3比1擊敗亞洲代表鹿島鹿角，巴里喺呢項賽事入球紀錄增至6球，僅落後首位C朗1球，必搏盡超越對方成為「世冠盃士哥王」，質素贏晒嘅皇馬以逸待勞，相信大炒冇難度。