曼聯嘅莫連奴時代正式劃上句號，好多球迷即刻「買定花生」，睇吓曼聯會繼續沉淪定強勢反彈，好在曼聯變天後嘅第1場只係作客「Big 6點心」卡迪夫城，正好成為「娃娃臉殺手」蘇斯克查嘅造勢大會，樂比認為曼聯今場贏波冇問題，讓一球上盤坐和望贏！
（Now 621周日凌晨1時30分直播）
莫連奴擺脫唔到「莫3季」魔咒，執教曼聯第3季就拜拜，最慘係今次連球員都唔撐，普巴更疑似出Po揶揄，可以話英名盡喪。無可否認莫連奴過往係一名極優秀嘅領隊，可惜適應唔到時代嘅變遷，又過分留戀昔日風光，搞到近年神憎鬼厭。其實由執教皇馬時期開始，到第2次領軍車路士，佢已經畀人技窮感覺，皆因球圈生態變得太快，球壇愈嚟愈強弱懸殊，單憑一招「泊大巴」難以取得成功，單調呆板嘅戰術、保守嘅踢法係「寸王」嘅死症。
崇尚進攻喪搶冧球迷
事實上莫連奴由風光少帥變成落泊中佬，佢嗰種高壓治軍手法已難以獲得認同，以往同泰利、林柏特及史奈達等主將攬頭攬頸，但由C朗開始、到夏薩特、普巴，佢同隊中主將都反面，駕馭唔到陣中球星注定失敗。不過人都走咗無謂再鞭屍，應着眼睇吓看守領隊蘇斯克查能否起死回生。45歲嘅蘇斯克查喺曼聯成名，年紀唔大之餘又有執教經驗，佢比「寸王」優勢之處係人緣贏成條街，同球員關係融洽，呢方面相信可滿足到保羅普巴呢位大帝，其他球員亦會走多一步，而且佢亦崇尚進攻足球，符合現今足球趨勢及球迷期望。
卡城正宗「Big 6點心」
最難得曼聯今仗對手係弱旅卡迪夫城，雖然「卡城」最近主場3連勝氣勢唔曳，但人腳始終屬降班料子，早前「帛金波」李斯特城亦喺萬眾期待下作客贏波，可見呢隊波係幫到手，更何況「蘇B」教過卡迪夫城，收風備戰點都有幫助，加上「卡城」之前5仗對Big 6全敗兼勁失17粒，一於撐曼聯換帥後可一掃烏風。