愛華頓遇強腳軟
周一凌晨英超聖誕快車上演大戰，愛華頓將於主場硬撼熱刺。啱啱喺聯賽盃淘汰北倫敦死敵阿仙奴嘅熱刺，近期走勢強勁，尤其一班前場攻擊手弗到爆，今場對住Big6私房菜「拖肥」愛華頓，熱刺就算作客都有大把本錢贏波，只讓平半，一於捧上盤。
（Now 621周一凌晨零時直播）
近7仗聯賽豪取6勝嘅熱刺頻頻踢出爭氣波，當中就包括早前以3比1擊敗主要競爭對手車路士，上仗再喺聯賽盃以2比0作客成功爆「廠」，淘汰死敵阿仙奴，士氣大振。值得留意，熱刺係今季聯賽唯一一隊冇出現過和局嘅球隊，非贏即輸，絕對睇得出領隊普捷天奴班波嘅鬥心。
熱刺中前場一班攻擊手狀態大勇，尤其向來以精湛射術見稱嘅王牌前鋒哈利卡尼，今季同隊友完美配合，交出助攻嘅能力都有明顯提升，表現更加全面。上仗面對兵工廠，哈利卡尼就再次交出靚傳造就隊友迪利阿里埋齋，加上孫興民同盧卡斯莫拉近期都屢建奇功，可見熱刺前場火力絕對不容低估。
近3交鋒拖肥全敗
「拖肥」愛華頓今季喺領隊馬高施華帶領下，發揮雖比上季有起色，不過遇到強敵即刻冇晒符；今季5次面對Big6球隊，愛華頓錄得1和4負，明顯係典型欺善怕惡嘅球隊。睇番往績，愛華頓近3次面對熱刺全部輸晒，畀對手食住個勢，今場形勢不容樂觀，寧願捧番熱刺上盤好過。