另一場意甲聖誕快車賽事，聯賽3哥國際米蘭主場挑戰2哥拿玻里。國米季初係威係勢，但近排跌晒Watt，呢場面對強敵拿玻里，隨時陷入膠着狀態，捧入球細好過。
（Now 638、有線614及654台周四凌晨3時30分直播）
意甲冠軍寶座畀祖雲達斯雄踞多年，搞到其他意甲豪強都好眼紅，其中就包括國際米蘭，季前佢哋曾大力增兵，簽入阿根廷前場新星拿達路馬天尼斯同比利時中場悍將尼恩高蘭，矢志成為挑戰霸權嘅「攔路虎」，可惜經過季初「蜜月期」後，馬天尼斯愈踢愈沉，尼恩高蘭又因為紀律問題，被球會內部罰坐波監，搞到國米近4仗聯賽僅得1勝2和1負嘅尷尬成績。查實近年國米進攻手段單一，前線過於依賴箭頭人物莫路伊卡迪，呢場如果阿根廷射手再畀對手嘜死，國米隨時再啞火。
拿玻里拋離8分睇定食
睇埋形勢，拿玻里拋離國米8分，穩坐積分榜次席，今仗和波拎1分都有着數，可以睇定嚟踢。況且兩隊近6次交手5次開2球或以下，其中近2次更互交白卷，可見兩強對壘戰況肯定膠着，加上拿玻里又有當弗中堅高列巴尼坐鎮後防，應付國米攻勢絕對綽綽有餘，入球細唔好錯過。