拆禮物日都有意甲睇
拆禮物日唔只有傳統英超開快車，意甲同樣冇得休息，今晚10點「黃金檔期」共有5場賽事，重頭戲為榜首祖雲達斯作客阿特蘭大。阿特蘭大本身實力已經不及對手，今場仲有兩大後防主將缺陣，要阻擋勢如破竹嘅祖記可謂難上加難，客W放心捧。
（Now 638、有線654及614台周三晚10時直播）
自從「葡萄牙球王」基斯坦奴朗拿度（C朗）登陸意甲，令呢個聯賽當堂「生晒」！不過意甲賽會似乎未夠喉，今季破天荒喺拆禮物日同12月29日安排兩輪聯賽，踢完先歇冬，擺明同英超「搶生意」！雖然成效如何仲係未知數，但聖誕檔期除咗英超仲有意甲睇，對球迷嚟講絕對係好事。
8場客戰全勝
講番今晚嘅焦點祖雲達斯作客阿特蘭大，祖記今季17場聯賽16勝1和，已經創下球隊史上最佳聯賽開局，而且佢哋今季8場作客保持全勝，水準極其穩定，除咗王牌C朗連續6場聯賽作客有士哥，另一箭頭文迪蘇傑喺C朗掩護下，今季喺多場關鍵大戰更屢建奇功，包括近期贏羅馬及國際米蘭都係靠佢一箭定江山，較早時間擊敗AC米蘭及拿玻里，文迪蘇傑個人亦射入3球，唔好忘記前線仲有保羅戴巴拿，對手要抵擋呢個進攻鐵三角真係唔容易。
阿特蘭大近期雖然都有前鋒杜雲沙柏達着火，近4場聯賽個人入6球，不過佢哋失球數字一樣多，近7場聯賽只有1場保持清白身，6場加埋失10球，而且上場作客輸畀熱拿亞1比3更加損兵折將，兩大後防主力拉菲爾杜萊及柏洛文奴喺末段領紅牌被逐，今場齊齊坐波監，對本已不穩嘅防線可謂雪上加霜，以祖記今季水準應可輕鬆再攞3分。