雖然今日得3場波受注，但阿King一樣搵到好嘢，其中英超聖誕新年快車獨腳戲，「聖人」修咸頓主場對韋斯咸最有心水。雖然「聖人」喺新帥效應下連贏2場，但防線實在太多甩漏，唔多信得過，邊讓得起近期客場弗爆嘅「錘仔幫」韋斯咸？一於捧讓球客勝。（Now 621周五凌晨3時45分直播）
修咸頓早前成績曳爆，結果怒炒主帥曉士，搵來前德甲RB萊比錫教頭哈辛侯治接手，佢上任後3仗取得2勝1負，包括近2場連贏阿仙奴同哈特斯菲爾德，令護級重現曙光。不過要留意，哈帥仍未解決球隊防守問題，領軍3仗全部有失波，連同之前比賽在內，「聖人」連續8仗未能保持清白之身，今仗仲有防中賀積查治要坐波監，防守更加唔穩陣。
安德列治兵疲捱「細」界
另一邊廂，韋斯咸雖然傷兵滿營，射手阿拿奧杜域、韋舒亞、盧卡斯佩雷斯等仍因傷倦勤，但主帥比歷連尼擅於排兵布陣，而且中場辛迪加斯表現Sharp醒，近5場轟2球兼交出3次助攻，帶領「錘仔幫」贏咗其中4仗，難怪近期英國傳媒《天空體育》，根據球員過去5周嘅入波、助攻、傳送等數據計算，辛迪加斯獲得9,279分排第2位，僅次於熱刺弗爆前鋒孫興民，真係唔講得笑。而且「錘仔幫」近期客場特醒，之前4仗作客2勝2和未輸過，今仗仲有得受讓咁筍，讓球客勝咪錯過。
其餘兩關都係比甲，洛格倫主場對布魯日，儘管洛格倫排緊包尾，但前鋒泰基連續2仗有士哥，而且近5次主場出擊只輸1場，不過布魯日前鋒舒利華斯及艾曼紐丹尼斯同樣弗番，鬥攻格局，中位數3/3.5球照捧入球大。最後係安德列治主場對華斯蘭比華倫，安德列治兩線作戰兵疲，連續7仗未贏過，陷入信心危機，華斯蘭比華倫作客不敢冒進，中位數開到3/3.5球，寧捧入球細。