沙拿奧巴美揚神鋒對決
今晚英超快車第3站尾場重頭戲，由榜首利物浦喺主場火併阿仙奴。今場係兩軍2018年最後一戰，利物浦近期旺到爆，聯賽8連勝，王牌穆罕默德沙拿又重拾射門鞋，面對傷兵成籮嘅兵工廠，必想乘勝追擊，但兵工廠前鋒奧巴美揚一樣腳風超順，兩大射手今仗實搏甩髀，加上近年交手例演入球騷，捧中位數3.5入球大更划算。
（Now 621周日凌晨1時30分直播）
利物浦今季開局超順，至今仍屬聯賽唯一不敗之師，現時以51分位居榜首，拋甩熱刺及曼城6分及7分。上屆歐聯決賽肩膊受傷的王牌穆罕默德沙拿，經過季初短暫低迷後，現已回復佳態，助利物浦近4場聯賽贏晒，當中更入5球，明顯弗番，其中2次係先開紀錄，配合好拍檔羅拔圖法明奴及沙迪奧文尼，以及近期上位常擔正嘅梳頓沙基利，火力全開。
兩軍交手例多波入
相反，阿仙奴狀態回落，與防線傷兵增加大有關係，除中堅洛賀丁提早收咧外，比利連、梅斯達菲、蒙利爾等後防主力皆受傷患困擾，隊長哥斯尼復出後嚴重缺態，近期被迫改用中場格列沙加移後打中堅，成為計時炸彈，難怪近12場聯賽，只得1場保持清白之身，防線欠穩。好彩前線保持水準，尤其係射手奧巴美揚腳風奇順，近7仗聯賽轟6球，累積13個士哥，以1球壓住沙拿同熱刺前鋒哈利卡尼，排緊射手榜榜首，今仗兩大神鋒對決，實多波入。何況兩軍交手例牌多波入，近11次交手9次開大，其中8次總入球開4球或以上添，2.5球大當然穩陣，但3.5球大賠率更佳。