全能C朗撞正「世界波專家」
周六晚上意甲聖誕快車大戰連場，其中打頭陣嘅有祖雲達斯主場鬥森多利亞。近況唔錯嘅森多利亞，有老將加利亞雷拉迎嚟職業生涯「第二春」，腳風順到爆，有力同坐擁球星基斯坦奴朗拿度嘅祖記對攻，中位數2.5球入球大捧得過。
（Now 638、有線614及654周六晚7時30分直播）
獲葡萄牙球星C朗加盟嘅祖雲達斯，今季進攻效率大大提升。至今攻入12個聯賽入球嘅C朗，除了頻頻為球隊搶得「士哥」之外，為隊友鋪橋搭路亦一樣掂，至今聯賽已經貢獻5次助攻，係「老婦人」嘅頭號助攻手，有能力全面嘅C朗在陣，最受益嘅非搭檔文迪蘇傑莫屬，呢位克羅地亞前鋒聯賽至今入咗8球，兩人雙劍合璧，足以令任何意甲後衞聞風喪膽。
大勇加利亞雷拉倒戈
識入波嘅唔止係得一班外國球星，今季唔少意大利本地薑表現一樣唔失禮，不過如果同大家講，最搶鏡嘅係森多利亞老將加利亞雷拉，唔少球迷肯定以為自己耳聾幻聽。不過你冇聽錯！皆因呢位35歲意國前鋒今季已經射入11球，係入球數最多嘅意大利本土射手，當中冇1球係12碼，而且近8場聯賽上陣仲場場有波入，就知佢有幾弗啦！
人稱「世界波專家」嘅加利亞雷拉，上輪聯賽再有佳作，炮製出蠍子擺尾靚波，幫助球隊擊敗基爾禾，呢場有佢倒戈面對舊主「老婦人」，森多利亞有本錢同對手演入球騷，中位數2.5球入球大唔好錯過。