蘇超周六頭場爆發國家打吡兼榜首大戰，聯賽榜「2哥」格拉斯哥流浪主場挑戰「1哥」些路迪。兩軍主帥謝拉特及羅渣士當年曾經合作打江山，對方有幾多料大家都好清楚；謝拉特首次坐正即要兼顧歐洲賽及聖誕快車，近期表現開始力有不逮，加上流浪自從2012年宣布破產後，連續14次國家打吡法定時間內都未贏過，實力同些路迪已愈拉愈遠，今場捧客W。
（周六晚8時30分開賽）
些路迪對賽贏成條街
流浪現時喺聯賽榜以3分落後少踢1場嘅些路迪，仍有爭標機會，不過今場已經係流浪12月第9場比賽，平均每隔3日踢一場，頻密賽程似乎考起首次領軍嘅謝拉特，事關呢8場比賽流浪只得3勝3和2負，當中最傷係歐霸盃最後一輪分組賽輸畀維也納迅速被淘汰，而且近3場聯賽亦先後兩度被喜伯年逼和失分，狀態明顯走下坡。正選中堅高臣上場聯賽傷出，今場上陣成疑，加上守將麥奧尼、中場賴恩堅特、艾菲特都受不同程度傷患困擾，唔齊腳要搶分難度更高。
些路迪同樣需要應付歐霸盃，不過成績及發揮明顯較佳，除咗成功躋身歐霸盃32強，近3場聯賽全勝兼轟入10球，喺兵源調配方面，羅渣士明顯稍勝一籌。流浪於2012年因財政問題被罰降落第3級別聯賽，自此之後，流浪與些路迪之間嘅實力差距愈拉愈遠；總計聯賽及盃賽，流浪對上14次交手喺法定時間之內只得3和11負，包括近8次1和7負，就算重返蘇超亦無復當年勇，些路迪作客出擊依然信得過，客W可放心捧場。