兩連勝狂轟11粒升次席
周六晚另一場英超重頭戲，新任2哥熱刺主場迎戰狼隊。熱刺果然不負「聖誕新年快車王」美譽，近2場聯賽先後大炒愛華頓及般尼茅夫，強勢趕過曼城升上聯賽榜次席；狼隊今季雖然偶有佳作，不過論板櫈深度始終唔及傳統勁旅，快車賽期好蝕底，熱刺讓一球、球半照捧上盤。
（Now 621周六晚11時直播）
熱刺對上4季喺普捷天奴帶領下，聖誕、新年快車檔期一共踢咗16場聯賽，結果取得13勝3和，不敗之餘得勝率更逾8成，今季佢哋表現似乎更上一層樓，頭2場對愛華頓及般尼茅夫唔只全取6分，而且2場加埋入11球，好睇又夠實際。由於曼城近4場聯賽輸3場，聯賽5連勝嘅熱刺已升上聯賽榜第2位，落後榜首利物浦6分，爭標絕對不是夢。
狼隊兵源不足攰爆
狼隊今季聯賽曾擊敗車路士、和過曼城、曼聯及阿仙奴，表現超水準，不過佢哋來來去去都係嗰14、5個主力球員，輪換機會唔多，場場搏盡咪話唔攰。狼隊對上2場快車比賽1和1負，2次都係先失波，今次對住狀態大勇嘅熱刺一旦先落後，隨時有更多空位畀對手打反擊，熱刺讓一球、球半依然捧得過。