兩隊前鋒死晒火
周日下午澳職中游大戰，紐卡素噴射機將會主場迎戰阿德萊德聯。噴射機今季攻力明顯退步，尤其早前喺主力攻擊手奧當路雲停賽下，其餘幾位前鋒都冇料到，今場面對勁敵阿聯難有作為，寧願捧中位數2.5球入球細好過。
（Now 639、有線615及655台周日下午4時30分直播）
上季成為澳職常規賽次席嘅噴射機，今季開局表現飄忽，就算主場出擊都未必有把握攞足3分，佢哋近4仗聯賽主場取1勝1和2負，仲全開2球或以下。前線火力同上季差咁遠，除咗因為主力攻擊手納博特上季離隊轉戰日職之外，射手奧當路雲亦因為季初停賽長期缺陣，雖然佢已經坐完波監復出，不過咁耐冇比賽，肯定冇咁快回復最佳狀態，加上其餘噴射機攻擊手都唔爭氣，搞到喺聯賽至今只收穫9個入球，係澳職攻力第2差嘅球隊，呢場想入波？噴射機真係要諗諗計。
阿聯門將頂得兩嘴
阿德萊德聯近期走勢下滑，近3場聯賽未贏過，其中兩場都冇波入，喺前鋒巴巴迪亞華拉長抖情況下，明顯缺乏入波利器，好彩門將保羅艾素表現搶眼，上仗撲出對方12碼，今場作客相信都會先做好防守，唔會輕易冒進，睇怕兩隊都好難有大手筆交易，中位數2.5球入球細要得過。