今晚英超聖誕新年快車第3站尾場，曼聯於主場迎戰般尼茅夫。「紅魔」自蘇斯克查接手後極速反彈，連被視為「毒瘤」嘅中場保羅普巴都翻生，今場係佢哋2018年最後一戰，可速食近況曳爆兼當黑嘅般茅，半場主勝有買趁早。
（Now 621周一凌晨零時30分直播）
曼聯自從怒炒「寸王」摩連奴，委任名宿蘇斯克查擔任看守領隊後，即刻連贏兩場轟8粒，亦係紅魔史上首位頭兩場帶隊均至少入3粒嘅領隊，「蘇B」重拾球隊一向進攻為主嘅風格，贏盡掌聲。由於阿歷斯山齊士、盧卡古及安東尼馬迪爾已經復操，「蘇B」表明會安排佢哋同拉舒福特、連格、桑馬達進行輪換，前線爭位情況激烈，後3者為保正選必定搶韁。
講到搶韁，就不得不提保羅普巴，呢位同「寸王」水火不容嘅「毒瘤」，喺蘇斯克查上任即大踢爭氣波，連同上場梅開二度贏哈特斯菲爾德3比1在內，佢近兩場入兩粒兼交出兩次助攻，重拾今夏替法國勇奪世盃嘅佳態，亦用行動證明摩帥唔用佢係錯誤決定。
般尼茅夫當黑慣早失
相反，般茅近9場聯賽僅2勝7負，而且面對強隊例腳軟，上場更慘吞熱刺5蛋，今季聯賽6鬥Big 6全部輸晒。除此之外，繼月頭中場路易斯曲克重傷提早收咧後，後衞西蒙法蘭西斯上仗右膝重創，至少要抖半年，接連損兵折將，真係黑到冇朋友。加上近6次聯賽交手，曼聯取得5勝1和，其中4次喺上半場領先，紅魔希望用大勝完結今年賽事，隨時一開波即搶攻，半場主勝更值博。