周一下午澳職大戰，中岸水手主場挑戰「3哥」珀斯光輝。水手今季表現不堪入目，9輪戰罷仲未贏過波，喺積分榜墊底，呢場對住前列分子珀斯光輝，根本難有搶分機會，捧客勝。（Now 638、有線614及654台周一下午4時直播）
水手7連敗信心盡失
上季聯賽排名包尾嘅中岸水手，今季矢志擺脫魚腩部隊稱號可惜有心無力，引入上季效力墨爾本城嘅前鋒羅斯麥哥馬克，希望可以靠佢出色嘅入球能力為球隊增加搶分籌碼，可惜呢位蘇格蘭射手加盟至今上陣5仗入得1球咁大把，表現唔對辦，早前仲喺操練期間受傷，呢場肯定唔使預佢。加上其他隊友都唔爭氣，上輪1比2輸畀紐卡素噴射機，球隊已經慘吞7連敗，士氣跌落谷底，呢場對住強敵珀斯光輝，邊有咁易偷到雞。
相反，珀斯光輝雖然上仗喺前列大戰中，被FC悉尼打破本季不敗身失去榜首，不過整體表現依然強勁，就算作客發揮都唔走樣，近4作客取3勝1和，呢場仲有西班牙中場迪亞高卡斯度傷愈復出候命，而且光輝呢場贏波就重登榜首再過一哥癮，對住包尾大幡水手肯定冇手軟，客勝有1.65倍咪錯過。