2019送舊迎新掃霉運
今日係元旦日，英超亦嚟到聖誕節新年快車尾站，正所謂新一年新開始，啱啱新敗嘅北倫敦雙雄熱刺同阿仙奴分途出擊，今晚難得遇弱，梗係想喺2019年首日用贏波沖喜，開個靚頭重上正軌。
阿仙奴主場搵富咸洩憤
今晚英超爆發倫敦打吡，阿仙奴主場迎戰富咸。阿仙奴喺年尾畀利物浦大炒一鑊堅冇癮，眾將谷埋谷埋一肚火，挾近9場主場聯賽7勝兼不敗之勢，勢必搵弱旅富咸祭旗，讓球主勝咪錯過。
（Now 621周二晚11時直播）
阿仙奴近期防線勁多傷兵，上仗作客利物浦領先1粒之下，竟接連犯錯反輸1比5，表現七國咁亂堅肉酸，前鋒奧巴美揚全場只係13次掂波，其中6次係中圈開波，賽後主帥艾美利話會嚴肅處理種種問題，隨時同眾將「照肺」。而且會作出一些改動，尤其係前線只得伊禾比推波組織做到威脅，預計今仗會復用箭頭拿卡錫迪，呢位法國前鋒具備hold波策應等支點作用，可令奧巴美揚更多空位搵機會，喺短時間內難改善防守下，預計「兵工廠」會以攻代守。
富咸內亂作客曳爆
仍在下游掙扎嘅富咸，雖然上仗補時入波擊敗哈特斯菲爾德1比0，走出6場不勝困局搶得救命3分，不過喺比賽期間，原本係球隊劊子手嘅阿歷山大米祖域，卻畀阿布巴卡卡馬拉搶射12碼仲宴客，一向老好人嘅主帥雲尼亞里，賽後都嬲爆話卡馬拉唔尊重球隊，嗰時真係想殺咗佢，睇嚟內部唔多和諧。況且富咸客場堅曳，近8場作客聯賽不勝兼輸咗7場，其中6仗至少輸2粒，相反阿仙奴自首輪不敵曼城後，近9仗主場聯賽取得7勝2和，其中6仗至少贏2粒，加上啱啱慘敗，誓搵富咸發洩，讓球主勝有計。
熱刺博反彈半場■卡城
英超聖誕快車去到周三凌晨，卡迪夫城主場挑戰熱刺。熱刺今季延續聖誕新年快車之王嘅傳統，近期走勢強勁，其中南韓Oppa孫興民狀態火熱，隨時半場都可以搞掂實力欠奉嘅卡迪夫城，半場客勝值博。
（Now 621周三凌晨1時30分直播）
聖誕新年賽期可以話係英超嘅傳統，每逢呢段賽程表現最搶眼嘅球隊，肯定非熱刺莫屬，近5季「快車期」熱刺總共出戰19次，取得15勝3和1負佳績，包括今季以6比2同5比0先後擊敗愛華頓同般尼茅夫，火力全開。其中前鋒孫興民近3次上陣就入咗4球腳風奇順，呢位攻擊好手雖然嚟緊要代表南韓出戰亞洲盃，但係都好識做，不惜犧牲亞洲盃頭兩仗分組賽嘅上陣機會，延遲同國家隊會合，留隊幫熱刺搶分，求勝心冇得彈。上仗熱刺意外失分輸畀狼隊之後，積分榜已經畀榜首嘅利物浦拋離9分，為重回爭標行列，呢場肯定一開波就搶攻。
近8聯賽7次早領先
新升班嘅卡迪夫城，實力明顯欠奉，尤其遇到強隊時多數都冇還手之力，今季6次面對Big 6球隊全部輸晒，早前就以1比5慘敗畀曼聯。況且熱刺近期聯賽好搶韁，近8仗聯賽7次半場就取得領先優勢，呢場面對弱旅卡迪夫城，絕對有本錢先下手為強，撐半場客勝。