周四凌晨英超前列分子車路士主場惡鬥修咸頓。車仔領隊沙利成功將夏薩特改造成入球機器，令佢入球能力大增，呢場對住後防穿晒窿嘅「聖人」修咸頓，仲唔一開波就搶攻？半場主勝唔好錯過。
（Now 622周四凌晨3時45分直播）
事實證明，車仔新領隊沙利係一位有性格有諗頭嘅主帥，隊中有基奧特同艾華路莫拉達兩位正印前鋒唔用，係要將以往打開進攻中場嘅「夏神」夏薩特強行改造，硬推呢位比利時攻擊手做箭頭人物，而事實證明沙利一意孤行係值得，夏薩特近4仗上陣就獨取3球，腳風甚順。而且車仔戰術多變，上仗就靠防守中場尼高路簡迪後上建功擊敗水晶宮，所以話對手想捉沙利條路絕對唔容易。
修咸頓換帥後場場失波
修咸頓喺中途接手嘅新帥夏辛侯迪帶領下，無可否認表現係有起色，不過呢位前RB萊比錫教頭一味掛住進攻，後防甩漏問題完全冇改善，佢接手5仗「聖人」場場有失波，包括上仗以1比3輸畀曼城。況且兩隊近6次交手，車仔全勝之餘，其中4次上半場已經領先，一於再追半場主勝。