啱啱踏入2019年，筆者先喺度祝各位讀者新年快樂。話咁快聖誕新年快車嚟到尾聲，亦係好戲在後頭，分別係今晚紐卡素對曼聯，以及聽晚榜首大戰─曼城硬撼利物浦，認真精彩。
近期英超熱門話題，梗係曼聯在蘇斯克查上任後全面復甦，連贏3場士氣大振，當然依家去評論「蘇B」係咪咁有料到，亦言之尚早，但佢帶領紅魔打出久違了嘅攻勢足球，淨係呢點已經贏盡民心，造訪紐卡素應可乘勝追擊。另一支紅衣球隊利物浦，更加得人驚，自從去年12月頭打吡戰小勝愛華頓，到歐聯擊退拿玻里涉險過關，跟住喺年尾最後一仗反勝阿仙奴5比1，各項賽事連贏8場，現時士氣、信心爆晒棚。
天助利物浦贏埋曼城
踢波唔單止係講實力，氣勢亦好緊要，因為連場報捷下，通常會愈踢愈順，順起上嚟嗰陣，甚至連好運都會跟住你，好似上仗大勝阿仙奴之役，紅軍兩次獲得12碼，相反阿仙奴球員亦有兩次喺禁區被侵犯，但都未獲判極刑，可見紅軍連運都贏埋。雖然曼城絕非善男信女，上仗亦擊敗修咸頓止血，但之前一不小心兩連敗，被甩開7分，真係連個天都幫埋利物浦，食住個勢今仗贏埋唔奇，不妨將紅魔客勝同紅軍客勝，整條過關二串三。