防線崩潰點打硬仗
踏入2019年冇耐，英超即迎來關乎爭標關鍵嘅榜首大戰，「3哥」曼城喺主場挑戰榜首利物浦。曼城上月接連失分，近5場輸足3場，防線全面崩潰，現時已落後「紅軍」7分之多，今晚主場對住氣勢如虹、聯賽仍保不敗金身嘅利物浦，樂比認為主隊讓唔起，建議捧1.78倍讓球客勝！
（Now 621周五凌晨4時直播）
曼城上季以破紀錄嘅100分封王，今季季初本來都順風順水，但去年底忽然跌晒Watt，尤其防線頻頻出現甩漏，喺各項賽事已連續10場都有失波，快車期間不敵李斯特城、水晶宮都輸得難睇，前線固然冇季初咁銳利，更致命嘅係防線近乎「放題任做」，兩閘丹尼路雷斯及戴爾夫甩漏甚多，中場防守大將費蘭甸奴受傷期間完全冇人代替到佢，可見曼城唔係全無破綻。
形勢大好利記飢渴感超強
事實上，英超近年競爭異常激烈，自曼聯2009年勇奪3連冠後，近9季都冇一隊能夠衞冕成功，曼城經過去年巔峰加上世界盃洗禮，狀態滑落屬正常現象，反觀利物浦上季痛失歐聯冠軍後，全隊都化悲憤為力量，睇得出球員嘅飢渴感超強，如今聯賽形勢大好，相信冇咁易放虎歸山畀曼城追番上嚟，今季佢哋對Big 6成績優異，踢咗6場錄得3勝3和不敗佳績，今場要全身而退唔係難事。
沙拿對「藍月」例有貨交
利物浦近期愈戰愈勇，全面開火，上仗「3叉戟」發威下大炒阿仙奴5個1皮相當輕鬆，穆罕默德沙拿近期狀態火熱，近6場射入7球，值得留意係佢對曼城表現特別搶鏡，近4次對曼城貢獻3個入球同2次助攻，今場勢必成為「藍月」心腹大患，以曼城近期防線嘅演出，守到沙拿都未必頂得住沙迪奧文尼及羅拔圖法明奴等其他紅軍射手，讓球客勝好路之餘，建議可同時向大波膽埋手。