狀態回勇搶分追巴塞
西甲歇冬期過後戰火重燃，周五凌晨維拉利爾將於主場同皇家馬德里進行補賽。皇馬啱啱喺世冠盃稱王，其中多位球員都打出水準，今場肯定希望將好勢頭帶番聯賽，順勢擊沉處於水深火熱之中嘅「黃色潛艇」，喺2019年首仗打響頭炮，1.7倍客勝捧得過。
（Now 632周五凌晨4時30分直播）
先講維拉利爾，上季聯賽最終排名第6位嘅「黃色潛艇」，自2013/14賽季重返頂級聯賽之後，近年一直成為出戰歐洲賽嘅中堅分子，可惜球隊今季再次深陷降班危機，聯賽16輪戰罷只係攞到15分，積分榜排名倒數第3，上季帶領球隊取得佳績嘅主帥卡利查都因此被炒魷，最慘係接任嘅新帥路爾斯加西亞都似乎冇乜料到，上仗面對聯賽包尾大幡侯爾斯卡，結果都係畀對手臨完場入番粒逼和，可想而知隊波有幾曳。維拉利爾士氣跌落谷底，就算今次有主場之利，但根本冇本錢同皇馬鬥。
馬高斯洛蘭迪孭飛搏殺
相反皇馬啱啱捧起世冠盃攞晒彩，其中喺決賽4比1擊敗東道主艾阿恩一役，小將馬高斯洛蘭迪射入靚絕世界波表現搶眼，呢位23歲中場重回銀河艦隊之後鮮有機會上陣，但冇自我放棄之餘，仲操出6舊條理分明嘅腹肌，狀態絕對毋庸置疑，今場有望再獲主帥蘇拿利重用。況且皇馬近期聯賽走勢回勇，收穫3連勝之餘仲未失過1球，為收窄同榜首巴塞隆拿嘅8分差距，今場肯定全力爭勝，睇好銀河艦隊可以成功擸走3分，客勝咪走寶。