又嚟到Happy Friday，今日受注賽事唔算多，但足夠大家玩吓過關刀仔鋸大樹，阿King提供心水希望幫到大家。
先講場澳職獨腳戲FC悉尼主場鬥中岸水手。水手開季10場聯賽未贏過，而且自從頭2輪打和布里斯班獅吼及墨爾本城後，聯賽更已累積8連敗，無論狀態、士氣皆愈踢愈沉。水手今季面對現排聯賽榜1、2位的珀斯光輝及墨爾本勝利均單場失4球，級數明顯有別，今次作客3哥FC悉尼恐怕又會大敗一場，FC悉尼近6場聯賽總入球全開3球或以上，轉捧2.5球入球大更上算。
（Now 638、有線654及614台周五下午4時50分直播）
熱刺出副選夠贏乙組仔
跟住講場英足盃第3圈，熱刺作客英乙球隊燦美爾。雖然熱刺今場或會收起哈利卡尼、孫興民、迪利阿里等主力，但面對燦美爾，起用盧卡斯莫拉、洛蘭迪、哈利雲克斯等已綽綽有餘，翻查紀錄，熱刺在近年英足盃作客場合，尤其是碰上低組別球隊都會搶攻，近5場英足盃作客客共入13球，擺明作客照攻。燦美爾戰力遠不及熱刺之餘，近6場中更有4場有失波，防線欠穩，遭逢強攻的熱刺如螳臂當車，難望偷雞，熱刺讓球半、兩球，照捧上盤。
最後要埋西甲下游大戰愛斯賓奴對雷加利斯，愛斯賓奴近況差到極，近7場輸6場，今仗仲有中場格尼路要坐波監添。雷加利斯雖然排16位，但近9仗正式賽事未輸過，當中包括打和西維爾同馬德里體育會，今場受讓極抵玩。（Now632周六凌晨4時直播）