澳職周六重頭戲，墨爾本勝利作客鬥西悉尼流浪者。勝利今場雖然續有本田圭佑因傷缺陣，不過另一星級鋒將托禾倫狀態大勇，加上勝利近8次對西悉流攞到6勝2和一面倒優勢，勝利讓平半上盤抵捧。
（Now 639、有線615及655周六下午4時50分直播）
勝利近2場聯賽先後打和墨爾本城及威靈頓鳳凰，日本中場本田圭佑腰同大髀都有傷，最快月底先可復出，不過另一中場安東尼斯今季已交出4個助攻，比本田仲要多1個，另外巴巴路西斯、杜羅奧斯喺入球數字及助攻次數都交到貨，足以填補本田嘅空缺，最重要係前瑞典國腳托禾倫連續4場比賽有士哥，已經完全融入球隊，絕對唔使擔心佢哋嘅進攻火力。
鳳凰當旺唔赦阿聯
西悉流上場主場淨吞墨爾本城2蛋，近7場聯賽只係贏過包尾大幡中岸水手，水準靠唔住，而且單計主場聯賽近4場輸3次，冇地利優勢可言。西悉流後防主力祖舒亞列斯頓要代表澳洲出戰亞洲盃，今場冇咗佢有啲濕滯。睇埋往績，勝利近8次對西悉流攞到6勝2和，包括今季首循環大勝4比0，勝利作客讓平半未驚過，上盤照捧。
至於早場賽事，阿德萊德聯主場鬥威靈頓鳳凰，阿聯近4次對鳳凰贏3次，不過鳳凰近期氣勢如虹，聯賽已經保持5場不敗，當中包括擊敗FC悉尼、打和珀斯光輝及勝利，絕對有真材實料，阿聯讓唔起對手，捧鳳凰讓球客勝。
（Now 639、有線615及655周六下午2時35分直播）