除咗曼聯之外，今晚英足盃第3圈仲有倫敦雙雄阿仙奴同車路士出場，其中尾場之一，阿仙奴要作客英甲分子黑池。阿仙奴防線依然傷兵滿營，主帥艾美利相信會繼續以攻代守，而且佢哋近期喺本土盃賽例多波入，簡簡單單捧2.5球嘅入球大最好。
（周日凌晨1時30分開賽、馬會網上文字直播）
阿仙奴踢法一向攻強守弱，無論係昔日領隊雲格或現任主帥艾美利麾下，出戰本土盃賽均以進攻行先，「槍手」喺近5場本土盃賽，就有4次總入球在3球或以上，其中包括在今屆英聯盃16強，曾以2比1擊敗今場對手黑池。查實阿仙奴目前後防仍然勁多傷兵，蒙利爾、洛賀丁等皆要養傷，為爭取晉級，隨時會繼續以攻代守，捧2.5球嘅入球大仲穩陣。
車仔搶韁速焚森林
至於較早時間開波，有上屆盟主車路士主場對英冠仔諾定咸森林。車路士日前聯賽被修咸頓悶和0比0，但佢哋一向重視英足盃，自2006至17年度球季起5度封王，係近12屆中捧盃最多嘅球隊。更何況，車仔出戰英足盃堅搶韁，近5場有4次喺上半場取得領先優勢，包括上屆決賽以1比0擊敗曼聯封王，面對在英冠經常先失波嘅森林，車仔就算收起王牌夏薩特，但淪為後備的箭頭艾華路莫拉達難得有機會披甲，隨時更搏命，勢必先發制人，半場主勝有計。
（周六晚11時開賽、馬會網上文字直播）