墨超次階段常規賽今周揭開戰幔，聽朝上演4場賽事，阿King最有心水嗰場，係利昂主場對堤格雷斯，「老虎」堤格雷斯續有前法國國腳基格納擔大旗，質素超晒班，造訪弱旅利昂有力打響頭炮，客勝有計。
（周日早上9時06分開賽、馬會網上文字直播）
堤格雷斯一向係墨超明星球隊，近年接連簽入基格納、伊度亞度華加斯及安拿華倫西亞等，星味甚濃，其中前法國國腳中鋒基格納老而彌堅，喺首階段常規賽轟入14粒，位列射手榜一哥，最終喺季後賽被普馬斯淘汰，誓要捲土重來。利昂不但無緣首階段季後賽，更只列第14位，令人失望，睇番佢哋首階段最後5仗主場出擊，竟然全部輸晒，曳到冇朋友，加上兩次面對「老虎」全敗，今場客勝值得捧場。
串蒙特雷W瓜達拉哈拉大
至於蒙特雷主場對帕丘卡，蒙特雷喺首階段常規賽排第5，並殺入季後賽4強，遠勝連季後賽都入唔到嘅帕丘卡，何況帕丘卡見親蒙特雷都腳軟，近6次交手得1和5負，主勝好路。（周日早上7時開賽、馬會網上文字直播）最後係瓜達拉哈拉主場對迪祖亞拿，兩軍在首階段均未能闖入季後賽，瓜達拉哈拉喺上年年尾出戰世冠盃，2場於法定時間只得1和1負，差強人意，但以迪祖亞拿首階段最後5仗僅得1和4敗嘅戰績，亦係捧唔落手，佢哋近5次交手，4次開3球或以上，揀入球大更佳。
（周日早上11時開賽）