今晚英格蘭足總盃第3圈頭場焦點，全面復甦嘅曼聯主場迎戰雷丁。「紅魔」自看守領隊蘇斯克查接手後高舉進攻旗幟，堅持有前冇後打法連贏4場，連勁沉嘅盧卡古都連續兩仗後備入替有士哥，今場面對英冠仔雷丁，勢必繼續火力全開，主W太熱冇肉食，3.5球嘅入球大更值得捧場。
（周六晚8時30分開賽、馬會網上文字直播）
曼聯看守領隊蘇斯克查，秉承球隊傳統進攻打法，依家全民皆攻，連格、安東尼馬迪爾、拉舒福特會喺前場不斷跑動做逼搶，然後發動反擊堅有侵略性，令「蘇B」帶隊後4場贏晒，成為紅魔史上第2位領軍頭4仗全勝嘅新帥，拍住傳奇教頭畢樹比。其實唔單止呢班正選有料到，今季堅沉被狂插嘅中鋒盧卡古，雖然冇份打正選，但連續2場後備入替冇耐即入波，非常搶韁，連同阿歷斯山齊士都好番，「蘇B」大把進攻球員可用，難怪佢接手後4場狂轟14球，3次總入球開4球或以上，為他博取留任增添籌碼。
雷丁遇曼聯例唔縮
不過，蘇斯克查呢種有前冇後嘅打法，亦令防線露出破綻，佢接手後4場只有1場保持不失，「蘇B」強調佢哋未失過「生波」，弊在防守敵軍嘅死球戰術未見改善。雖然雷丁位處英冠下游，但近年面對紅魔堅進取唔玩死守，曾經作客淨吞4蛋，以及主場僅負3比4，預計今場會合演入球騷，3.5球嘅大盤有計。