周一晚上亞洲盃分組賽激戰連場，等我阿King同大家分享過關心水。其中C組中國將會硬撼吉爾吉斯，近幾屆亞洲盃首戰都有唔錯表現嘅「國足」，今次喺名帥納比指揮下，面對第一次喺賽事亮相嘅吉爾吉斯有力大勝，讓球主勝係好路。
（Now 670周一晚上7時直播）
中國近3屆首戰全勝
雖然意大利名帥納比賽前已經講到明，亞洲盃之後唔再繼續執教，不過佢肯帶隊踢埋亞洲盃，足以證明呢位曾帶領意大利世盃奪冠嘅老帥求勝心不死。而且「國足」今屆表現絕對值得期待，皆因主力前鋒武磊表現日漸成熟，啱啱過去一季就以27球成為中超神射手，打破近年外援壟斷射手榜首位嘅格局，表現神勇。加上「國足」不嬲出戰亞洲盃都可以打響頭炮，過去3屆首戰全勝，呢場對住經驗欠奉嘅吉爾吉斯，大勝冇難度，讓球主勝值博。
南韓伊朗實力超班
同日仲有南韓對菲律賓，雖然頭號球星孫興民仲未歸隊，不過有奇誠庸同黃義助壓陣嘅南韓依然超班，輕取菲律賓唔難，讓球主勝捧得過。最後伊朗將會面對也門，以上年世盃大軍為班底嘅伊朗絕對係今屆奪標熱門之一，實力麻麻嘅也門呢場難逃一劫，繼續都係揀讓球主勝。