輸完未回氣 盃仔例失威
今晚英足盃第3圈獨腳戲，狼隊主場硬撼利物浦。紅軍今季聯賽大過天，啱啱先同曼城激戰一場，輸波兼未回氣，今仗隨時收起部分主力，加上近年喺本土盃賽戰績曳爆，造訪遇強愈強嘅狼隊必陷於苦戰，轉捧讓球主勝好過。
（周二凌晨3時45分開賽）
作為傳統勁旅，利物浦志切一嘗英超冠軍滋味，而且啱啱踢完聖誕快車賽期，包括作客激戰爭標勁敵曼城輸1比2，耗力不小未回氣，預計主帥高普今場會讓部分主力休息。佢賽前講明會起用後備門將米洛列特及左閘艾拔圖摩蘭奴，即係話艾利臣比加及安德魯羅拔臣有得抖抖，不過前兩者今季雪到硬晒唔慌有態，點都有影響。
狼隊擅反擊遇強愈強
狼隊上場聯賽主場雖以0比2輸畀水晶宮，但今季遇強隊特別醒神，喺聯賽曾擊敗熱刺及車路士，其決心縮後打反擊嘅戰術，往往令強隊束手無策。翻查紀錄，利物浦近年對本土盃賽堅唔重視，連英聯盃及英足盃在內，紅軍近6場本土盃賽只獲得1勝5負，包括喺前屆英足盃第4圈爆大冷，喺主場以1比2不敵當時仍屬英冠球隊嘅狼隊，而且紅軍心繫英超，未必好有決心爭呢類盃仔，狼隊可趁機偷雞，主場出擊仲有受讓咁筍，讓球主勝咪錯過。