東南亞新王有驚喜
在阿聯酋舉行的亞洲盃分組賽繼續激戰連場，其中周二晚將上演D組賽事伊拉克鬥越南。曾經喺亞洲盃奇迹奪冠嘅伊拉克，去年爆出選人醜聞，戰鬥力成疑，相反啱啱喺東南亞錦標賽稱王嘅越南，近年異軍突起，今場有望乘勢追擊，力爭小組首勝取得完美開局，今場越南獲得受讓，必選有2.8倍嘅讓球客勝。（Now 670周二晚9時30分直播）
啱啱過去嘅2018年，可以算係越南足球發展嘅豐收年，喺南韓籍主帥朴恒緒帶領下，繼去年初U23亞洲盃歷史性打入決賽之後，年尾再喺東南亞錦標賽重奪失落10年嘅冠軍寳座，睇得出越南足球發展突飛猛進。
越南「雙阮」有料到
越南球員經歷兩次大賽之後，累積咗唔少經驗，大部分更獲徵召出征今次亞洲盃，而最受關注嘅肯定係有「越南美斯」之稱嘅阮公鳳，以及新星阮光海，後者更榮膺東南亞錦標賽最佳球員，有兩位進攻孖寳壓陣，越南絕對有力再次創造驚喜。
曾經喺2007年捧起亞洲盃嘅伊拉克，實力備受肯定，可惜伊拉克足球發展繼續受客觀因素影響，其中主帥卡坦歷舊年年中先至上任，同球隊磨合時間唔算充裕，期間仲爆出選人醜聞，令伊拉克備戰過程蒙上陰影。今場雖然有效力意甲球會阿特蘭大嘅後衞阿里卡特謙助陣，面對氣勢如虹嘅東南亞新貴越南，未必有力贏波，寧願捧讓球客勝好過。
沙特北韓大火併
去到周三凌晨，E組沙特阿拉伯將會面對北韓。去年搶得球隊世盃歷史上首勝嘅「沙漠之狐」沙特阿拉伯，地面傳控踢法令人印象深刻，今屆亞洲盃繼續由西班牙領隊比斯領軍，兼有曾經外流西甲嘅中場大將艾達沙尼領軍，相信會保留一貫重攻輕守極具觀賞性嘅風格，面對戰力有番咁上下嘅北韓隨時上演入球騷，中位數2.5球入球大捧得過。（Now 670周三凌晨零時直播）