今午澳職獨腳戲，西悉尼流浪者主場迎戰威靈頓鳳凰。西悉尼連場失分，教頭巴布為保帥位不容再失，況且近年交手食住鳳凰，主勝有計。（Now 639、有線655及615台周二下午4時50分直播）
尼亞拿重拾射門鞋
西悉尼近期戰績不佳，近4場聯賽3度輸波，令主帥兼前德國國腳巴布壓力爆煲，為保帥位必須諗計爭勝。事實上，西悉尼上場臨完場前失波，以1比2僅敗給墨爾本勝利，全場不落下風，表現總算有起色。況且西悉尼首席射手奧利奧爾尼亞拿，近4場聯賽有2球進帳，腳風轉順，絕對係佢哋今場爭勝之匙。
鳳凰基地位於新西蘭，作客一向係佢哋死穴，今季5場聯賽作客有1勝3和1負，表現已算是比以往大有進步，不過鳳凰嘅中場核心、西班牙籍球員曼迪今場要坐波監，影響的確甚大。況且鳳凰一向係西悉尼嘅「私房菜」，兩軍近6次聯賽正面交鋒，西悉尼豪取5勝1和不敗佳績，5場勝仗有4次至少贏2粒，真係格食格，近3次對碰全勝中，射手奧利奧爾尼亞拿亦喺其中2場有士哥，今場有機會再騷哥利，一於博主勝。