外流新星擔大旗
喺阿聯酋舉行嘅亞洲盃，今晚終於輪到大熱門日本登場，在F組首輪出戰弱旅土庫曼。貴為4屆盟主，「藍武士」今次徵召唔少新血，希望藉今次賽事測試一眾外流新星嘅實力，加上近年於分組賽例搶韁，讓球主客和日本讓2球冇有怕，讓球主勝有計。
(Now 670周三晚7時直播)
自去年代替離職嘅西野朗接手日本後，森保一致力為「藍武士」換血，除咗保留中堅吉田麻也、右閘長友佑都等部分舊將外，新世代球星如大迫勇也、南野拓實、堂安律等亦獲得重用，其中效力薩爾斯堡嘅南野拓實最標青，近5場國際賽轟入4球，一舉奠定正選位置，今次亞洲盃正係佢哋騷哥利嘅好機會。就算賽前有「10號仔」中島翔哉及守田英正因傷退隊，但補選嘅通天老倌乾貴士及在世冠盃射入兩球的「帶刀侍衞」鹽谷司，亦具級數及經驗，影響不大。
土庫曼實力差一大截
世界排名第127位嘅土庫曼，在亞洲盃外圍賽僅以1分之微力壓中華台北取得次名出線，演出唔算突出，而且佢哋上次參戰亞洲盃決賽周，已經要數到2004年嘅事，無論實力及經驗，都比4度封王嘅日本輸10條街。翻查紀錄，「藍武士」近5場亞洲盃分組賽，都喺上半場已取得領先優勢，可見佢哋堅搶韁，今場有力炒起土庫曼。