周三續演兩場澳職，頭場阿德萊德聯主場迎戰墨爾本勝利。阿德萊德聯傷兵問題依然嚴重，加上今季主場聯賽只贏1場，面對近況大勇嘅墨爾本勝利唔易應付，平手盤捧勝利。
（Now 639、有線655及615台周三下午4時50分直播）
阿德萊德聯上場0比0悶和威靈頓鳳凰，開季7場主場聯賽只得1勝4和2負，得勝率不足兩成，而且佢哋仲有前鋒巴巴迪亞華拉、拉治蘭布魯克、史譚迪路普路斯及中場美高保蘭特等飽受傷患困擾，加上中場雲斯利亞累積5面黃牌需要坐波監，殘陣出擊想反彈唔易。
墨爾本勝利今場雖然續有中場本田圭佑腿筋受傷倦勤，幸好前瑞典國腳托禾倫持續大勇，連續5場聯賽有士哥，個人轟入6球，包括上場對西悉尼流浪者梅開二度，領球隊2比1擊敗對手全取3分，腳風超順，另一中場安東尼斯今季聯賽亦交出4次助攻，位居助攻榜前列，足以填補本田空缺。何況勝利近年一直係阿德萊德聯剋星，雙方近8次於聯賽交鋒，勝利錄得6勝1和1負佳績，有格食格味道，平手盤力足坐和望贏。
光輝悉尼「大」鬥法
尾場榜首珀斯光輝主場鬥3哥ＦＣ悉尼。光輝上月輸畀ＦＣ悉尼1比2、被打破聯賽不敗身，好彩佢哋即時反彈連贏兩場，今次再喺主場布陣，自然想報番一箭之仇；不過ＦＣ悉尼亦唔係弱者，聯賽4連勝之餘，4場加埋入咗12球，今次係對攻格局，中位數2.5球大盤捧得過。
（Now 639、有線655及615台周三晚7時直播）