亞洲盃分組賽周四凌晨，仲有D組伊朗將會和伊拉克上演「兩伊」大戰。賽前被睇低一線嘅伊拉克，今屆發揮一啲都唔失禮，不過面對以一班喺歐洲揾食球員為主力嘅伊朗，似乎未必有力輕易取得入波，中位數2.5球入球細係好路。
（Now 671周四凌晨零時直播）
賽前兩軍同樣2戰全勝得6分，而伊朗就以較佳得失球差優勢暫列榜首，呢場只要唔輸波，就可以順利以1哥身份晉級16強，所以自不然踢法會以穩守為主。作為今屆奪標大熱之一，伊朗喺執教功力深厚嘅葡萄牙領隊奎羅斯帶領，今屆亞洲盃一路高歌猛進，兩戰全勝之餘，仲一球波都冇失過，可見整體實力絕對超班。
近3對賽全開2球或以下
賽前負面新聞纏身嘅伊拉克，明顯冇受場外因素影響，場上表現依舊勇猛，尤其球員個人質素同以往一樣保持高水準，其中年僅18歲前鋒穆罕納迪阿里夠晒搶眼，上仗面對也門後防多人夾擊之下，都可以靠個人能力連扭多人成功破網，可惜呢場對手伊朗實力明顯更強，想發圍絕對唔容易。睇番往績，伊拉克近3次對住伊朗全開2球或以下，包括上屆8強同對手喺法定時間內打成1比1，呢場兩軍隨時再鬥到難分難解，都係捧中位數2.5球入球細更穩陣。