今晚有2場英超，先有前菜愛華頓對般尼茅夫，仲有壓軸好戲熱刺火併曼聯。熱刺與紅魔應該係近期狀態最弗嘅球隊，的確自聖誕新年快車至依家，兩隊都連場報捷，比起曼城、利物浦、車路士及阿仙奴更為突出，因此今仗正面交鋒，備受關注。熱刺今季反璞歸真，班主撳住荷包唔科水，主帥普捷天奴卻令球員眾志成城，並透過出色的調兵遣將，不但在歐聯、英聯盃及英足盃均順利過關，於聯賽位居前列，更係今季至依家唯一非贏即輸（16勝5負）、未曾和波嘅英超球隊，睇得出佢哋嘅爭勝決心。
改玩進攻足球有運行
另一邊廂，曼聯怒炒「寸王」摩連奴之後，即刻士氣大振，我之前在專欄都提過，只要繼任人做「寸王」嘅相反版本，紅魔自然會止跌回升，果然喺蘇斯克查接手後，放棄綁手綁腳嘅打法，大踢進攻足球，眾將開心之餘，成績亦立即反彈，聯賽連盃賽在內，「蘇B」領軍後5場贏晒，雖然對手係偏弱，但打波有時係打道氣，現時紅魔氣勢如虹，比起「寸王」過於謹慎、就算左閘勞基梳爾助攻都要搵幾個球員補位防守嘅做法，「蘇B」鼓勵球員多進攻、多走動做前場壓迫嘅戰術，更受球員及球迷歡迎。由於兩隊都咁弗，預計會合演入球騷，喺勝負難料下，隨時一團「和」氣。